रत्नागिरी : जागतिक अन्नदिनानिमित्ताने रत्नागिरीतील मत्स्य महाविद्यालयात १६ ऑक्टोबर रोजी ‘फिश ओ फिश’ ही पोषक मत्स्य पदार्थांची पाककृती स्पर्धा आणि प्रदर्शन आयोजित करण्यात आले होते.
‘भुकेलेल्यांना अन्न पुरविणे म्हणजे केवळ भूक भागवणे नव्हे, तर सकस अन्न पुरवून सशक्त पिढी निर्माण करणे,’ हे या वर्षीच्या अन्नदिनाचे घोषवाक्य होते. त्या पार्श्वभूमीवर, उच्च प्रतीच्या प्रथिनांचा स्त्रोत असलेल्या मत्स्य प्रकारांचा उपयोग करून, त्यापासून पौष्टिक पदार्थ तयार करण्याला प्रोत्साहन देण्यासाठी दापोलीचे डॉ. बाळासाहेब सावंत कोकण कृषी विद्यापीठ आणि शिरगाव येथील मत्स्य महाविद्यालय यांनी ‘फिश-ओ-फिश’ ही स्पर्धा आयोजित केली होती. या स्पर्धेत मासे हा प्रमुख घटक वापरून त्यापासून तयार केलेले स्नॅक्स, सॅलड, तसेच मुख्य पदार्थ या तीन प्रकारात ३१ स्पर्धक सहभागी झाले होते. या सर्व खाद्यपदार्थांचे चव, घटक पदार्थ, पौष्टिक गुणधर्म, तसेच कल्पक मांडणी या निकषांवर परीक्षण करण्यात आले. गद्रे मरीन एक्पोर्टस् येथील प्रशिक्षित व अनुभवी फूड टेक्नॉलॉजिस्ट स्नेहा पाटील, शेफ अनिकेत बंडबे आणि शेफ अनुप सावंत यांनी सर्व पाककृतींचे परीक्षण केले.
या स्पर्धेत पौष्टिक सॅलड या प्रकारात सौ. सारिका भडकमकर, शुभम माजिक यांना अनुक्रमे पहिले दोन क्रमांक मिळाले, तर काजल राठोड यांना उत्तेजनार्थ पारितोषिक मिळाले. पौष्टिक स्नॅक्स या खाद्यप्रकारात मसाला किचन, रत्नागिरी आणि सारिका भडकमकर यांना पहिले दोन क्रमांक मिळाले. उत्तेजनार्थ पारितोषिक समिता शेट्ये यांना मिळाले. पौष्टिक मुख्य पदार्थ प्रकारातही प्रथम क्रमांक सारिका भडकमकर यांना मिळाला. द्वितीय क्रमांक प्रकाश पाटेकर यांना मिळाला, तर उत्तेजनार्थ पारितोषिक प्रांजली चोप्रा यांना देण्यात आले.
या कार्यक्रमाला डॉ. बाळासाहेब सावंत कोकण कृषी विद्यापीठाचे कुलगुरू डॉ. संजय सावंत व विस्तार शिक्षण संचालक डॉ. संजय भावे उपस्थित होते. त्यांनी स्पर्धकांशी चर्चा करून विविध खाद्यपदार्थांची माहिती घेतली.
स्पर्धेच्या अंतिम सत्रात सर्व विजेत्या स्पर्धकांना कुलगुरू डॉ. संजय सावंत, विस्तार शिक्षण संचालक डॉ. संजय भावे, मत्स्य महाविद्यालयाचे सहयोगी अधिष्ठाता डॉ. हुकुमसिंह धाकर, तसेच मत्स्य प्रक्रिया तंत्रज्ञान व सूक्ष्मजीवशास्त्र विभागप्रमुख डॉ. आशिष मोहिते यांच्या हस्ते पारितोषिके वितरित करण्यात आली.
या स्पर्धेचे आयोजन करण्यासाठी डॉ. दबीर पठाण, प्रा. श्रीकांत शारंगधर, डॉ. जयाप्पा कोळी, डॉ. अजय देसाई व प्रा. साईप्रसाद सावंत व ईएलपी कार्यक्रमांतर्गत विभागातील सर्व विद्यार्थी, पदव्युत्तर विद्यार्थी यांनी विशेष परिश्रम घेतले. आयोजनात डॉ. केतन चौधरी (विभागप्रमुख, विस्तार शिक्षण विभाग) आणि डॉ. स्वप्नजा मोहिते (विभागप्रमुख, मत्स्य जीवशास्त्र विभाग) यांचाही महत्त्वाचा सहभाग होता. या स्पर्धेच्या थीमच्या अनुषंगाने बॅनर, प्रशस्तिपत्रक, प्रसिद्धिपत्रके यांची रचना बहर महाकाळ यांनी केली होती.